Arbeidsplassen vår er viktig. På jobben yter vi ein innsats, og vi får løn og stadfesting for at det som vi gjer er noko verdt. Miljøet og arbeidskameratane er eit samhald for seg sjølv der vi brukar det beste og meste av oss, tid og krefter. Om eg ikkje kjenner meg heilt i form, vil eg heller på jobb og vere saman med gjengen enn å vere sjukemeldt og gå på veggene heime. På jobb kan vi trivast og yte, -

x

- eller er det ikkje alltid heilt greitt å finne seg skikkeleg til rette? Vel, oppgåvene kan stundom verke uklåre, og så menn kjedelege! Etter mi meining er det både det eine og det andre som skulle vore gjort noko med. Og helsa vår, då, - det røyner på etter kvart, det er slitsamt. Sant å seie, somme dagar er tunge. Kva er det som skjer? Kven bryr seg? Kva kan eg gjere? Greier eg å hengje på?

Samarbeid er heilt avhengig av kommunikasjon.

Samarbeid ER kommunikasjon.

Vil vi samarbeide, må vi kommunisere.

Samarbeidet kan bli meir utfordrande og fruktbart. Samhandling er noko vi  kan utforske vidare og lære meir om. Vi kan nok kome opp i kriser, men samtidig vekse oss sterkare, forandre retning, utvikle oss.

Kommunikasjon har sin pris og er ikkje minste motstands veg. I samarbeid får vi bryne oss på kvarandre, lære å dele og ta imot, og vi kan bli flinkare til å ta vare på kvarandre.

Kommunikasjon er både strev og moro. Tøffaste alvor, og lystigaste liv og røre. Gir inspirasjon og nye krefter i smått og i stort. Enten du vil eller ikkje. Men vil du litt likevel, vinn du mykje meir.